Donkie, buffel in SA vleis gevind
2013-02-26 14:29
Kaapstad – 'n Studie deur wetenskaplikes van die Universiteit van Stellenbosch het getoon dat Suid-Afrikaners ook voedselprodukte koop wat bedrieglik as beesvleis gemerk is.
“Die studie het getoon dat enigiets van soja, donkie-, bok- en waterbuffelvleis in sowat 68% van die 139 maalvleise, hamburgers, deli-vleise, wors en gedroogde vleise wat getoets was, gevind is. In ander gevalle is onverklaarde plantmateriaal ook opgespoor,” het die universiteit se nuus-blog Maandag berig.
Die studie, wat gedoen is deur Donna-Maree Cawthorn en Louw Hoffman van die universiteit se departement van veekundige wetenskappe, is in die internasionale Food Control-joernaal gepubliseer.
“Ons studie bevestig dat die verwerkte vleis wat verkeerdelik gemerk is, algemeen in Suid-Afrika is en nie net regulasies van die etikettering van voedsel oortree nie, maar ook ekonomiese, godsdienstige, etiese en gesondheidskwessies skep,” het Hoffman gesê.
"Onkonvensionele spesies soos donkie, bok en waterbuffel is ook in 'n aantal van die produkte gevind."
Verskeie voorvalle is die afgelope ruk in Europa aangemeld waar perdevleis in voedselprodukte wat as beesvleis gemerk is, gevind is.
Perdevleis is in verskeie voedselprodukte soos in hamburgers, lasagne, pastasous, skooletes en selfs hospitaaletes in Europa gevind.
Lees hier meer.
– Volg Nuus24 op Twitter
