Donasies gevra ná sorgsentrum brand
2011-06-13 17:04
Johannesburg – Daar word dringend gesoek na donasies vir die oorlewendes van ‘n brand waarin 12 mense Maandag in die vroulike vleuel van die Struisbult-sorgsentrum in Springs dood is, het die Ekurhuleni metropolitaanse munisipaliteit gesê.
“Donasies van komberse, beddegoed (lakens, handdoeke, kussingslope, bedoortreksels), klere, pantoffels, toiletware en nie-bederfbare kos word dringend benodig.” Het woordvoerder Zweli Dlamini gesê.
Die Ekurhuleni uitvoerende burgemeester Mondli Gungubele en die Gautengse LUR vir gesondheid Ntombi Mekgwe het ook ‘n beroep gedoen op nie-regeringsorganisasies en die privaatsektor om ‘n helpende hand te verleen.
Volgens Sello Mokoena, die woordvoerder vir die Gautengse departement van gesondheid, is diegene wat deur die brand geraak is na die Zanele Mbeki-sentrum geneem.
“Hulle het alles verloor,” het Mokoena gesê.
Uit die 27 wat in die brand beseer is, is 19 na die Pholosong-hospitaal in Tsakane geneem, terwyl die oorblywende agt na die Verre-Oosrand-hospitaal in Springs geneem is.
Agttien uit die 19 is ontslaan, maar een persoon is steeds by die Pholosong-hospitaal om behandeling vir longontsteking te ontvang.
Ander is op die toneel vir rookinaseming en skok behandel. Familielede en vriende het ook berading ontvang in ‘n fasiliteit wat in ‘n ander gedeelte van die sentrum opgerig is.
“Die omvang van die skade by die Struisbult-sorgsentrum word nog bepaal, het Dlamini gesê.
Daar was 59 mense wat in die vleuel gewoon het. Die vleuel is Maandagoggend deur die brand vernietig en die dak het inmekaargesak .
Nooddienswerkers het daardie deel van die gebou as onveilig verklaar.
Die geregistreerde privaat fasiliteit, wat ‘n subsidie van die provinsie ontvang, spesialiseer in die sorg van bejaardes en verstandelik gestremdes. Sowat 155 mense woon in die sentrum.
Vir inligting oor donasies, kontak Bongani Ngomane van die Gautengse departement van gesondheid en sosiale ontwikkeling op 082 460 3608
Volg Nuus24 op Twitter
- SAPA