Dominee se seun het makker in tronk ontmoet
2012-11-12 16:19
Harrismith – Martin Brits, die aangenome seun van die vermoorde dominee Willem Brits, het sy medebeskuldigde in die tronk ontmoet, berig OFM.
Martin was voorheen in die tronk vir bedrog, maar die besonderhede oor sy medebeskuldigde, Elliot Mhlambi, se kriminele rekord is nie bekend nie.
Die dominee en sy aanstaande skoonseun, Gerhardus Vermeulen, is verlede week in sy pastoriehuis vermoor en sy vrou, Dorothea, is erg aangerand.
Mhlambi is kort ná die misdaad aangekeer en Martin is Vrydag in hegtenis geneem.
Die saak teen Martin en Mhlambi is Maandag uitgestel en hulle sal tot hul volgende hofverskyning in aanhouding bly.
Mmako Mophiring, polisiewoordvoerder, het gesê Martin sal binnekort skuld beken op die misdaad. Mhlambi het aangedui dat hy volgende week in dieselfde hof om borgtog sal aansoek doen.
Dorothea het Sondag 'n terugslag gehad en is weens erge hoofbeserings in 'n kritieke, onstabiele toestand. Die egpaar se ander drie kinders, Thea, David en Willie, sal Dinsdag na Bloemfontein reis om hul ma in die Mediclinic Bloemfontein te besoek, is vroeër berig.
– Volg Nuus24 op Twitter
