'Dokters vrees vir hul lewens'
2010-11-04 00:03
Johannesburg – Gesondheidspraktisyns het Woensdag 'n beroep op Aaron Motsoaledi, minister van gesondheid, gedoen om die belangrike kwessie van veiligheid en sekuriteit by hospitale aan te spreek.
Dít volg nadat 'n dokter deur 'n groep mans by die Pelonomi-streekhospitaal in Bloemfontein verkrag is.
Die Suid-Afrikaanse Mediese Vereniging (SAMV) het gesê Motsoaledi moet veiligheid en sekuriteit by sy planne insluit om die gesondheidsorgstelsel te verbeter.
"Ons doen 'n beroep op hospitaalbestuurders, departementele leiers in die verskillende provinsies, provinsiale ministers en Motsoaledi om die belangrike kwessie aan te spreek met die sensitiwiteit en dringendheid wat dit verg," het die SAMV in 'n verklaring gesê.
"Die kwessie van sekuriteit is van nasionale belang omdat dit nie net die dokters of gesondheidsorgwerkers raak nie, maar ook die pasiënte wat ons bedien."
Die vereniging het ook 'n beroep op die regering gedoen om alle "onbevoegde" sekerheidsmaatskappye by staatshospitale te verwyder sodat mediese personeel veilig kan voel by hul werk.
"Gaan ons wag vir al die patriotiese dokters om onveilige staatshospitale in hul hordes te verlaat voor ons gaan optree? Hoeveel mense moet nog slagoffers wees voor daadwerklike aksie geneem word?" het die SAMV gevra.
"Moet ons al die dokters mobiliseer om nie op noodgevalle te reageer as hul lewens bedreig word nie?"
Volg Nuus24 op Twitter
- SAPA