Dokters in hof oor baba se dood
2011-07-21 07:02
Bethlehem - Twee geneeshere van die dorp het Woensdag hier in die streekhof op aanklag van strafbare manslag verskyn ná die dood van ’n babameisietjie.
Drs. Roelof Pistorius, ’n chirurg, en Thomas Wessels, ’n pediater, is in die beskuldigebank nadat Riaan Vlok en sy vrou, Franciska, die aanklag ingedien het ná hul dogtertjie, Anneke, se dood in 2008.
Anneke was 7 maande en 22 dae oud toe sy in die Mediclinic Bethlehem dood is. Dit was ná ’n noodoperasie op ’n naeltjiebreuk waarmee Anneke gebore is. Pistorius was betrokke by die operasie en Wessels het voor die tyd en daarna aan die familie raad gegee oor Anneke se toestand.
Nadat mev. Vlok Woensdag getuig het, is sy deur die dokters se advokaat, Salie Joubert van Pretoria, ondervra. Vlok het Woensdag getuig dat Anneke in die vroeë oggendure van 11 Junie 2008 verskriklik begin huil het en nie wou ophou nie. Ná ’n besoek aan haar huisdokter die middag is daar voorgestel dat Anneke na ongevalle gehaas word omdat haar naeltjiebreuk beklem word en sy geopereer moet word.
In die ongevalle-afdeling het Pistorius ook Anneke ondersoek en die operasie voorgestel. ’n Noodoperasie is gedoen waarin die geklemde dermpie losgemaak is en die gaatjie waarin dit vasgeknyp was, toegewerk is.
Volgens Vlok was Anneke ná die operasie geensins gemaklik nie en het sy die hele tyd “hortend asemgehaal” en gebraak. Anneke se toestand het die volgende dag versleg en Vlok het al hoe angstiger geraak. Wessels het weer in die prentjie gekom het en Anneke se toestand help dophou.
Met ’n latere besoek van Pistorius het hy en Vlok verskil oor Anneke se toestand en het Pistorius volgens Vlok uit die vertrek gestorm en gesê: “Ek onttrek my van dié baba.”
Joubert het gesê volgens sy kliënte was dit nooit die geval nie. “U het wel volgens dr. Pistorius geweier dat ’n ander geneesheer betrek word.”
Mev. Vlok het ontken dat Pistorius se weergawe van die storie waar is. Anneke is die aand na die intensiewesorgeenheid van Mediclinic gebring waar dokters deur die nag gespook het om haar aan die lewe te hou. Sy is egter die volgende oggend dood. Vlok het aan haar man bly sê dat iemand ’n fout gemaak het.
“Ek het gesê iemand moet haar oopsny en kyk wat het fout gegaan. Die lykskouing het gewys daar was ’n gaatjie in haar dunderm.”
Vlok sê dit is veroorsaak deur die operasie wat Pistorius op Anneke uitgevoer het.
Joubert het Vlok se toestand tydens haar dogtertjie se hospitalisasie telkens as “hiper-angstig” beskryf. Joubert sê albei sy kliënte voel dat daar geen nalatigheid aan hul kant was nie. Die verhoor duur voort.
Volg Nuus24 op Twitter.
- Volksblad