Dokters help tydelik ná babas sterf
2013-01-08 14:29
Johannesburg – Die Suid-Afrikaanse Mediese Vereniging (SAMV) het Dinsdag gesê hy sal dokters na die George Masebe-hospitaal in Limpopo stuur, waar vier babas dood is weens ‘n tekort aan dokters.
“Ons lede, beide uit die openbare en private sektore, het van vandag [Dinsdag] aangebied om te help met rondes by die kindersaal,” het Phophi Ramathuba, voorsitter van die SAMV, gesê.
“Ons sal beurte maak om gesondheidsdienste te bied tot die situasie weer genormaliseer het.”
Die SAMV werk saam met die departement van gesondheid in Limpopo om oplossings te vind vir die tekort.
Ramathuba sê die babas se dood is tragies en wys dat daar bestuursprobleme in openbare hospitale is.
Die SABC het intussen berig dat daar nie net ‘n tekort aan dokters was nie, maar dat die hospitaal se hele bestuursafdeling op verlof was ten tyde van die sterftes.
“Ons verstaan dat mense daarop geregtig is om verlof te neem oor die feesseisoen, [maar] ons eis steeds antwoorde van die provinsiale gesondheidsbeamptes oor waarom hierdie babas dood is,” het sy gesê.
Ramathuba het gesê veranderings moet gemaak word om te verseker dat mense se vertroue in die openbare gesondheidstelsel herstel word.
– Volg Nuus24 op Twitter
- SAPA
