Dokter wat glo aanrand kan 'niks onthou' nie

2012-10-05 12:17

Johannesburg – Die voormalige Suid-Afrikaanse militêre psigiater dr Aubrey Levin, wat tereg staan op 10 aanklagte dat hy sy pasiënte in Kanada mishandel het, het aan ‘n voorverhoor gesê hy kan geen aanrandings onthou nie.

Sy vrou Erica het in die week in ‘n hof in Calgary getuig tydens ‘n verhoor om te bepaal of haar man geskik is om verhoor te word.

Sy sê haar man se geestesgesondheid het drasties agteruit gegaan sedert sy inhegtenisname in 2010, berig Beeld.

Levin sê hy onthou slegs oppervlakkige besonderhede oor pasiënte se name en beweer dat hy nie enige van die aanklagte wat teen hom gebring is verstaan nie.

Gedurende sy tyd as die hoof van die psigiatriese eenheid by 1 Militêre Hospitaal in Pretoria, het Levin ‘n omstrede program gelei om homoseksualiteit  te “genees” deur mense te skok.

Hy het in 1994 na Kanada getrek en staan nou tereg op aanklagte van seksuele mishandeling van minstens 10 voormalige pasiënte. Die meeste van hulle was veroordeelde gevangenes wat namens die staat berading van Levin ontvang het.

Volgens die Calgary Herald het die Kanadese akademikus dr. Lillian Thorpe getuig dat Levin aan kognitiewe demensie ly en moontlik ook aan Alzheimer se siekte.

Erica Levin het aan die hof gesê haar man het agteruitgegaan tot die punt waar sy hom moes help om in die oggend sy broek aan te trek.

Aan die einde van Donderdag se verrigtinge het Levin sy eie baadjie en jas aangetrek.

– Volg Nuus24 op Twitter

 

- SAPA