Dokter verkrag glo dokter
2011-08-12 07:05
Odendaalsrus – ’n Getroude dokter wat op kontrakgrondslag by die Thusanong-staatshospitaal op die dorp gewerk het, is op ’n aanklag van verkragting op ’n jonger kollega in hegtenis geneem.
Die beweerde verkragting het in ’n staatshuis op die hospitaalterrein plaasgevind.
Die vermeende verkragter, ’n 38-jarige algemene praktisyn van Brakpan, is vandeesweek in die landdroshof op Odendaalsrus op borgtog van R2 000 vrygelaat. Deel van sy borgtogvoorwaardes is dat hy nie met die klaer in kontak mag kom nie en dat hy nie sy voete in die Goudveld mag sit nie, behalwe wanneer hy hier in die hof moet verskyn.
Jabu Mbalulu, woordvoerder van die Vrystaatse gesondheidsdepartement, sê die slagoffer, ’n 26-jarige dokter, word deur die departement bygestaan en alle nodige hulp wat aan verkragtingslagoffers gegee word, is ook aan haar beskikbaar gestel.
Sy is ook tyd gegun om by haar familie en vriende die gebeure te gaan verwerk.
Hy sê die vermeende verkragter, wat twee weke lank by Thusanong gewerk het, is geskors. Sy kontrak van twee weke met Thusanong het verlede week, toe die beweerde verkragting plaasgevind het, verstryk.
Sers. Puleng Motsoeneng, polisiewoordvoerder, sê die vermeende verkragter moet op 2 September weer in die hof verskyn.
Sy sê die beweerde verkragting het verlede Woensdagaand in die slagoffer se huis op die hospitaalterrein plaasgevind.
Die getroude dokter het die jong dokter glo gebel en gesê dat hy iets met haar wou bespreek. Sy het hom toe na haar huis genooi.
Ná hul gesprek het hy glo daarop aangedring om met haar seks te hê en toe sy weier, het hy haar na bewering gedwing en gewelddadig verkrag.
Sy het die klag eers Vrydag, nadat die getroude dokter ná die verstryking van sy kontrak terug Brakpan toe is, by die polisie gaan aanmeld.
Hy is daar in hegtenis geneem en na Odendaalsrus teruggebring waar hy Maandag die eerste keer in die hof verskyn het.
Motsoeneng sê borgtog is nie deur die staat teengestaan nie.
Volg Nuus24 op Twitter.
- Volksblad