Dokter sê sy handel in horing was 'wettig'
2011-07-23 10:26
Julian Rademeyer, Media24-ondersoekspan
Johannesburg – ’n Dokter en wildplaaseienaar van Noordwes het erken hy het renosterhoring en leeubene aan ’n maatskappy van Laos verskaf wat ontmasker is as ’n front vir ’n Suidoos-Asiese smokkelsindikaat.
Dr. Deon Engelbrecht het egter vandeesweek ontken hy weet enigiets van die sindikaat se bedrywighede.
Volgens ’n faktuur wat Die Burger bekom het, het Engelbrecht (55), ’n algemene praktisyn van Stella en eienaar van die wildplaas Leeuwbosch, in November verlede jaar byna R500 000 uit die verkoop van 7,12 kg renosterhoring gemaak.
Hy het dit aan een van die beweerde baasbreine van die sindikaat, Chumlong Lemtongthai, verkoop.
Hy het ook 44 leeukarkasse teen R330 000 verskaf aan die in-en-uitvoermaatskappy Xaysavang Trading, waarvan Lemtongthai ’n direkteur is.
Engelbrecht het Vrydag aan Die Burger gesê verteenwoordigers van Xaysavang het “net een” renoster op sy plaas “gejag”.
“Al my goed is wettig. Die renosterjag is met natuurbewaring se teenwoordigheid gedoen en ek het permitte gehad. Jy kan nie hier by my fopjag doen nie, want jy moet die renoster soek.”
Engelbrecht het gesê hy besit nie meer renosters nie weens die “hoë risiko” daaraan verbonde en ’n stroopvoorval verlede jaar.
“Ek was een van die eerste ouens by wie gestroop is en ek het toe my renosters weggemaak.”
Die Burger het gister onthul hoe ’n Vrystaatse leeuteler, Marnus Steyl, renosterhorings van miljoene rande aan Xaysavang verskaf het en hoe Thaise prostitute en ontkleedanseresse as “jagters” gebruik is om jagpermitte te bekom.
Volg Nuus24 op Twitter.