Dokter se moordenaars steeds op vrye voet
2012-01-29 17:55
Johannesburg – Niemand is nog in hegtenis geneem in verband met die moord op ‘n dokter wat in ‘n motorkaping in Pretoria doodgeskiet is nie, het die polisie in Gauteng Sondag gesê.
Dr. John Moche, ‘n 41-jarige dermatoloog by die Steve Biko Akademiese Hospitaal, is Vrydagaand deur kapers doodgeskiet.
Luidens ‘n berig in Rapport het hy omstreeks 20:30 in sy Range Rover gesit buite ‘n meenthuis-kompleks in Viljoenstraat. Hy het met ‘n verpleegster gepraat, wat ‘n passasier in die motor was.
Twee gewapende mans het die deure oopgemaak en hul albei uit die motor getrek. Een van hulle het Moche een maal in die bors geskiet. Hulle het met die motor gevlug. Die verpleegster het geen beserings opgedoen nie.
Die motor is later verlate in Atteridgeville gevind.
Die polisie het nog niemand in hegtenis geneem vir die misdaad nie, het lt. kol. Lungelo Dlamini Sondag gesê.
Die departement van gesondheid in Gauteng het by monde van die LUR, Ntombi Mekgwe, en die departementshoof, Nomonde Xundu, skok en medelye oor die voorval uitgespreek.
“Ons doen ‘n beroep op lede van die gemeenskap om die polisie by te staan in hul ondersoek en sodoende te verseker dat die oortreders in hegtenis geneem word,” het die LUR gesê.
Die uitvoerende hoof van die hospitaal, dr. Ernest Kenoshi, het Moche as hardwerkend en ‘n goeie vriend beskryf.
- Volg Nuus24 op Twitter
- SAPA