Dokter red tweejarige, man by Langebaan
2011-01-03 09:13
Die Burger
Kaapstad – Selfs tydens sy vakansie het dr. Cleeve Robertson van die Metro EMS op Nuwejaarsdag ’n tweejarige seun en ’n man uit die Langebaan-strandmeer gered.
Robertson se vrou, Charmaine, het Saterdag ’n angstige kleuter in ’n klein opblaas-binneband sien dryf. Dit was naby die huisboot waarop die gesin by Kraalbaai vir die vakansie tuis gaan.
Robertson, sy vrou, sy dogter Carrie en haar vriend, mnr. Kent Paulsen, het in hul skiboot gespring en na die kind gejaag.
Met hulle aankoms het hulle die huilende seun van sowat twee jaar oud alleen in die binneband aangetref.
“Hy was so bang ek moes mooi met hom praat om hom uit te kry. Gelukkig het hy plat gesit,” het Robertson, wat direkteur van Metro se nood- en mediese reddingsdiens (EMS) en die NSRI se nasionale mediese hoofbeampte is, gister gesê.
Hulle het gehoor hoe mense skree en toe gesien hoe ’n man daar naby aan die kant van ’n ongebruikte huisboot klou.
“Net toe ons by hom kom, het hy onder die water verdwyn. Ek en Kent het gesukkel om hom op die skiboot te kry, want hy het sowat 90kg geweeg. Hy het flou geword toe ons hom uiteindelik op die boot kry,” het Robertson gesê.
“Dit was ongelooflik. Nog ’n paar minute, en hy sou dit nie gemaak het nie. Die water was seker 3m diep omdat dit hoogwater was.”
Hulle het albei op die strand afgelaai, waar Robertson noodhulp toegepas het.
Robertson het gesê die kind is deur ander kinders op die strand kom haal. Die man is vermoedelik die kind se oom of pa.
Verdere besonderhede oor hul identiteit en hoe hulle in die moeilikheid beland het, is nie bekend nie, het mnr. Craig Lambinon, woordvoerder van die NSRI, gesê.
Die NSRI het nog ander voorvalle aangemeld:
* Kleinmond: Die lyk van ’n man is Saterdag om 17:50 in die Palmietrivier gevind nadat ’n noodoproep ontvang is dat iemand vermis is.
Volgens ao. Martin Mostert van die Kleinmond-polisie het die man (43) Saterdag teen 17:40 saam met sy drie stiefkinders gaan swem, berig Ilse Krige.
Die drie kinders wat saam met die man gaan swem het – so tussen 8 en 11 jaar oud – het hul ma by die Faerie Glenn-dagkampeerterrein langs die Palmietbrug gaan roep.
Die oorledene se naam kon nog nie bekend gemaak word nie.
* Kommetjie: ’n Oproep is ontvang van rooi seinfakkels wat naby die strand gesien is. By nader ondersoek is gesien dit is drywende Chinese lanterns. Dit is die vierde keer dat die NSRI in Kommetjie hiervoor uitgeroep is.
* Struisbaai: Die stasiebevelvoerder van die NSRI in Agulhas het kort voor op Nuwejaarsdagvoor middernag gesien hoe ’n klein rubberbootjie met drie mense daarin omslaan. Die NSRI is ontplooi en al drie mense, wat beweer het hulle soek ’n lekker visvangplek, is gered.
* Yzerfontein: ’n Seun (12) is na die hospitaal vervoer nadat hy beseer is toe ’n boot hard geland het nadat dit deur die branders gebreek het.
Volg Nuus24 op Twitter.