Dokter in sop oor 319 aanklagte

2012-12-13 14:44

Johannesburg – ‘n Dokter wat by die George Mukhari-hospitaal praktiseer, is in verband met 319 aanklagte teen hom in hegtenis geneem.

“Ons het vandag ‘n 49-jarige dokter by die hospitaal in hegtenis geneem nadat hy tussen 2008 en 2012 na bewering onwettige eise met die vergoedingskommissaris in die departement van arbeid gemaak het,” het kapt. Paul Ramaloko gesê.

Die dokter, wat as ‘n algemene praktisyn by die hospitaal in Ga-Rankuwa in die Noordwes was, het na bewering 99 onwettige eise by die departement se vergoedingsfonds en 218 onwettige eise by die Bonitas- mediese fonds ingedien.

“Hy het beweer dat mense aan diens beseer is. Met Bonitas het hy beweer dat hy mense behandel het [en van mediese fondse geëis],” het die woordvoerder gesê.

Die eise beloop glo R500 000.

Ramaloko sê die dokter het ook as ‘n ginekoloog gepraktiseer, terwyl hy net as ‘n algemene praktisyn geregistreer is. 

Hy sê die dokter is voorheen in 1989 en 1991 op aanklagte van bedrog vervolg. Dié aanklagte het ook onregmatige eise behels.

Volg Nuus24 op Twitter

- SAPA