'Dokter' in hof oor bedrog

2013-02-12 09:22

Johannesburg – 'n Ongekwalifiseerde "kruiedokter" was as 'n algemene praktisyn gepraktiseer het, het op aanklagte van bedrog in die Hartswater-landdroshof verskyn, het Beeld Dinsdag berig.

Gert Meyer is verlede Donderdag in hegtenis geneem terwyl hy 'n pasiënt in sy spreekkamer ondersoek het. Die polisie het beslag gelê op sowat 100 pasiëntlêers, doodsertifikate, X-strale en voorskrifmedikasie.

Karen Gul, staatsaanklaer, het die hof gevra om die saak vir twee weke uit te stel sodat die ondersoekbeamptes kan vasstel hoeveel geld Meyer uit sy pasiënte gemaak het.

Conrad Bester, Meyer se regsverteenwoordigerm het gesê sy kliënt is sedert Donderdag agter tralies en dat die ander inligting oor die naweek ingesamel kon word.

Landdros Vincent Jameson het die saak tot 19 Februarie uitgestel, wanneer Meyer om borgtog sal aansoek doen.

– Volg Nuus24 op Twitter

- SAPA