Dokter 'getraumatiseer' oor Bonnette se beserings

2012-11-27 09:15

Pretoria –‘n Dokter sê hy was getraumatiseer nadat hy Ina Bonnette ná haar gru-aanval ondersoek het, het die stad se hooggeregshof Maandag gehoor.

Dr. Johan Janse van Rensburg het getuig die beserings aan die slagoffer se borste was baie erg. Hy het ook gesê dit was traumaties om haar te behandel.

Bonnette het verlede week getuig haar eksman, Johan Kotzé, het haar met verskeie voorwerpe gemartel.

Sy sê hy het haar tepels afgesaag, ‘n spyker by haar wonde ingedruk en gate in albei haar silikoon-borsinplantings gemaak.

Bonnette het ook getuig dat haar eksman se vermeende medepligtiges – Andries Sithole, Pieta Mohlane en Frans Mphaka – haar om die beurt verkrag het.

Van Rensburg sê Bonnette was erg getraumatiseer en het aan skok gely toe hy haar enkele ure ná die misdaad gesien het.

Sy het gehuil en gesê haar seun, Conrad, is doodgeskiet. Bonnette het ook gesê haar tepels is afgesny en dat sy seksueel aangerand is.

Die verhoor duur voort.

Volg Nuus24 op Twitter 

- SAPA