Dokter dood onder bed gevind
2010-02-03 18:28
Johannesburg - ‘n 71-Jarige afgetrede kardioloog is vroeg Woensdag dood in sy huis aangetref, het die Pretoria polisie gesê.
Volgens kapt. Colette Weilbach, is Francois Steenkamp omstreeks 08:30 deur sy huishulp op sy kamervloer in Newlands aangetref.
“Die liggaam was vasgemaak, en onder die bed met 'n kopbesering gevind,” het Weilbach gesê.
Volgens haar is daar geen tekens van geforseerde toegang nie, maar al die kamers is geplunder.
“Daar word vermoed dat die voorval Dinsdagaand plaasgevind het, en dat die aanvallers in ‘n wit Toyota Tazz gevlug, wat aan die oorledene behoort het.”
Die motief vir die moord is steeds onbekend. Daar is ook nog nie vasgestel wat alles uit die huis gesteel is nie.
‘n Saak van moord en roof word ondersoek.
Steenkamp het as ‘n kardioloog by die Hart-hospitaal in Pretoria gewerk voor sy aftrede. Hy laat ‘n dogter en drie seuns agter.
- Sapa