Dokter: ‘McBride was nie sober’
2010-04-28 13:35
Pretoria – Die dokter wat Robert McBride na afloop van die ongeluk ondersoek het, meen die voormalige Ekurhuleni-metropolisiehoof was nie sober nie.
Só het die Pretoria-streekshof Woensdag gehoor.
“Ek het hom ondersoek en hy was nie sober nie,” het Inbanathan Sagathevan aan die hof gesê.
Volgens Sagathevan het hy ‘n oproep van sy neef Stanley Sagathevan, wat ‘n kollega van McBride was op daardie stadium, ontvang. Hy is glo “gesmeek” om die voormalige polisiehoof te ondersoek.
Sagathevan se spreekkamer was gesluit, maar omdat hy McBride drie keer vantevore gesien het, het hy ingestem.
Hy het McBride ‘n paar uur na die ongeluk ondersoek.
“Sy hele houding was anders, hy was baie vriendelik en ontspanne,” het hy gesê. Na bewering was McBride op ‘n vorige geleentheid baie formeel gewees.
“Sy oë was ook bloedrooi en hy was van balans as hy geloop het.”
Volgens Sagathevan het McBride na alkohol geruik. Op die vraag of Sagathevan gedink het dat McBride in sy toestand kon bestuur het hy geantwoord; “Nee, definitief nie.”
McBride staan tereg op aanklag van bedrog en regsverydeling nadat hy in Desember 2006 in ‘n botsing betrokke was.
Volgens Sagathevan het McBride “direk voorgestel” dat hy sy neef, Stanley Sagathevan, se bloed trek en dit voordoen as McBride s’n.
- Sapa
Volg Nuus24 op Twitter.