Dodetal styg ná gewaagde ontsnappoging in Jhb
2012-10-22 18:45
Johannesburg – Minstens drie mense is dood ná 'n ontploffing in 'n voertuig wat gevangenes na 'n tronk in Johannesburg vervoer het.
Vier mense is in 'n kritieke toestand en 10 ander het ligte beserings opgedoen. Altesaam 36 gevangenes was in die voertuig.
Owerhede het bevestig dat die onploffing op pad na die Johannesburg-Sentraal-gevangenis plaasgevind het, en nie buite die tronk soos voorheen berig is nie, het die nuuskanaal eNCA op sy Twitter-blad bekendgemaak.
Brig. Neville Malila, polisiewoordvoerder, het gesê die voertuig het verhoorafwagtende gevangenes vanaf die Randburg-landdroshof na die Johannesburg-Sentraal-gevangenis vervoer, berig Sapa.
"Toe hulle by die hoek van Naturena en die ou Soweto-hoofweg stilhou, het die bestuurder 'n groot slag gehoor. Hy het 'n gat in die deur opgemerk en gesien hoe twee gevangenes ontsnap."
Die bestuurder het uitgespring en die twee in hegtenis geneem.
Die polisie het bevestig dat die bestuurder van die voertuig nie stilgehou het ná die ontploffing nie, omdat dit 'n groot sekuriteitsbreuk kon wees. Daar is ook bevestig dat "gevaarlike misdadigers" deel was van die ontsnappoging, berig Eyewitness News.
Die ploftoestel was agterin die voertuig en die polisie het gesê 'n ondersoek sal bepaal watter tipe toestel gebruik is en hoe gevangenes daarin kon slaag om die toestel weg te steek.
"Ons forensiese deskundiges fynkam die toneel om vas te stel watter tipe toestel in die ontploffing gebruik is," het Malila gesê.
Sake van moord, die besit van plofstowwe en die ontsnapping uit wettige aanhouding word ondersoek.
Thomas Moyane, nasionale hoof van die departement van korrektiewe dienste, het gesê dit is die eerste keer dat so 'n gewaagde ontsnappoging plaasvind.
Die polisie het gesê hy sal teruggaan na die tekenbord om soortgelyke voorvalle in die toekoms te verhoed.
– Volg Nuus24 op Twitter
