Dlamini-Zuma deel planne vir AU

2012-10-24 10:25

Johannesburg – Nkosazana Dlamini-Zuma, die voormalige minister van binnelandse sake, het haar eerste vergadering as die voorsitter van die Afrika-unie se kommissie gehou, het die AU Woensdag gesê.

Dlamini-Zuma het Dinsdag aan die kommissie gesê dat haar administrasie sal werk aan groter doeltreffendheid, beter interne en eksterne kommunikasie, die mobilisering van hulpbronne en die bevordering van geslagsgelykheid.

Sy het gesê die AU het baie vir die kontinent gedoen, maar min mense weet van die organisasie se prestasies.

"[Afrika se inwoners] sal die unie net ondersteun as hulle dit ken. Mense weet nie genoeg van die AU nie," het Dlamini-Zuma gesê.

Sy het ook beloof dat haar administrasie gereelde vergaderings met personeel sal hou om te verseker dat alle belanghebbendes in die kommissie te alle tye weet wat op alle vlakke gebeur.

Die vergadering is by die AU se konferensiesentrum in Addis Ababa, Ethiopië gehou.

– Volg Nuus24 op Twitter.

- SAPA