'Dit het niks met enigiemand te doen' – Malema
2011-08-01 09:08
Wolfram Zwecker en Lizel Steenkamp
Johannesburg - Dit het niks met enigiemand uit te waai of hy enige voordeel getrek het uit die familietrust nie en dít is die laaste hoofstuk in die storie.
Só het Julius Malema, leier van die ANC-jeugliga, Sondag gesê oor nog media-onthullings oor sy uitspattige leefstyl.
Malema het dié stelling Sondagmiddag gemaak ná afloop van die 24ste nasionale kongres van die jeugliga wat die laaste paar dae in Boksburg gehou is.
“Hoe sal ek ’n trust wat in die naam van my ouma en dié van my enigste kind geopen is, misbruik deur geld van skelms en misdadigers daarin te laat betaal?
Ek het ’n middel gesoek waardeur ek geld kan kanaliseer wat vir projekte gebruik word en dit is waarvoor die trust gestig is,” het hy gesê.
Met verwysing na nuwe onthullings dat hy besig is om ’n huis vir sy ouma te bou het hy gesê daar moet onthou word “daardie vrou het nege kinders in die wêreld gebring en hulle het kinders en dié het kinders.
Dis nie net ek wat suksesvol is nie, daar is nog wat suksesvol is en almal bou die huis,” het hy gesê.
Oor die interdik wat hy verlede week teen die Sondagkoerante City Press en Rapport wou bekom, het Malema daarop gewys dat hy nie die berig opsig self wou keer nie, maar net die verspreiding van leuens in die berig.
“Julle kan skryf wat julle wil, ek glo in die vryheid van die pers, maar nie leuens nie. Die regter het ook daarop gewys dat daar ander middele tot my beskikking is soos om vir City Press te dagvaar. Dit word nou gedoen.
“Wat ons wou voorkom is, dat leuens gepubliseer word soos dat iemand R200 000 in die trust inbetaal het in ruil vir tendervoordele.
“Ek is nie bang vir die Valke of die belastingman nie, hulle kan kom. Niemand gaan my keer om die boodskap van ekonomiese bevryding uit te dra nie.
As hulle my in die tronk gooi, sal ek vir die mede-gevangenes die boodskap uitdra,” het hy gesê.
Lizel Steenkamp berig uit Kaapstad dat die ANC Malema nié voor stok gaan kry nie, selfs al is daar week ná week nuwe beweringe oor sy uitspattige leefstyl en toenemende agterdog oor waar hy die geld kry om dit te finansier.
“Die ANC het nie sy eie polisiediens nie. Dis hoekom die SAPD daar is, om enige ANC-lid wat van ’n misdaad verdink word te ondersoek,” het Jackson Mthembu, nasionale woordvoerder, gister gesê.
Volgens hom sal die ANC ’n verduideliking van Malema eis sodra al die ondersoeke na sy geldsake afgehandel is “en dit iets beduidend oplewer”.
City Press en Rapport, susterkoerante van Beeld, het Sondag berig Malema het meer as R2 miljoen van die R3,6 miljoen vir sy luukse woning in Sandton in Johannesburg kontant betaal.
Dié huis is intussen afgebreek om vir ’n nuwe paleis wat glo sowat R16 miljoen gaan kos, plek te maak.
Malema slaan vure dood sedert die Sondagkoerante verlede week die bestaan van die familietrust onthul het en berig het dat sakelui van Limpopo na bewering geld daarin gedeponeer het.
’n Hooggeplaaste ANC-lid het Sondag op voorwaarde dat sy naam nie genoem word nie, gesê daar is ’n geruime tyd reeds vermoedens in sekere ANC-kringe dat Malema “iewers ekstra geld kry” om vir sy huise, motors en klere te betaal.
Die vakverbond Cosatu het by monde van Patrick Craven, woordvoerder, opnuut ’n beroep op die ANC gedoen om Malema voor die party se etiekkomitee te daag.
Volg Nuus24 op Twitter.
- Beeld