Dit gons op web oor matriekvideo
2011-12-20 09:52
Marelize Potgieter
Kaapstad – Heftige reaksie is gister ontlok deur die video wat mense ’n kykie gee in die wel en weë van matrieks wat met vakansie is.
Die kommentaar het gewissel van mense wat meen kinders se gedrag is “die vrugte van grootmense se werk”, die gevolg van lang hare wat op skool toegelaat word, of van onbetrokke ouers wat nie hul opvoedingstaak behoorlik doen nie.
Die Burger se webwerf het gister vroegoggend al uit sy nate gebars met opmerkings oor die dokumentêr. Gister teen 17:00 het byna 37 600 mense die video gekyk en baie het kommentaar op Die Burger, Beeld en Volksblad se webwerwe gelewer.
Die dokumentêr is oor vier dae op die KwaZulu-Natalse vakansiedorp Margate deur Nadine Theron, ’n multimediajoernalis van Media24 se digitale span, verfilm. Die eerste episode is gister beskikbaar gestel en die tweede een is vandag te sien.
Terwyl die jongklomp in die noorde groot partytjie gehou het, lyk dit of jong mense op Plettenbergbaai en Hermanus hulle “heel goed gedra” het.
“Daar was geen voorvalle waar die polisie moes ingryp of waar ernstige misdrywe gepleeg is nie,” het kapt. Malcolm Poje, Suid-Kaapse polisiewoordvoerder, gesê.
Kol. Francois de Wet van die Hermanus-polisiekantoor het gesê: “Ons het geen noemenswaardige probleme gehad nie.”
Kommentaar het ingesluit (die oorspronklike spelwyses is behou):
* jj.eksteen: “Kinders van die nuwe! verbeterde! nie-verkrampte! Suid-Afrika!”
* Chris: “Ek dink dat 1% van die skool verlaters teen die einde van die vakansie dalk dood sal wees en dan wil die ouers langs ’n oop graf staan en hulle oë uit huil want my bloeitjie doen nie sulke dinge nie.”
* AB: “Die seuns se hare het nou te lank geraak na hulle uit die skool is, daarom doen hulle wat hulle doen...aldus vorige nuusberigte en kommentare dat kort hare dissipline gee.”
* JamesBotha1: “Julle is geskok, julle skeinheilige mense, julle is so vals soos Lusifer self. Ons kinders is wat ons van ons jeug gemaak het.”
* Sarie: “SKOKKEND!”
Volgens Theron bly die skokkendste ding van die video die feit dat die kinders geen skaamte aan die dag gelê het wanneer hulle die kamera gesien het nie.
Vir meer agtergrond en inligting, kliek hier.
- Die Burger