'Dis ’n nuwe struggle'
2011-10-29 07:05
Die ANC-jeugliga het geskiedenis gemaak en vreeslose ekonomiese vryheidsvegters lui nou ’n nuwe struggle in, het ’n pootuit Julius Malema gister by die Uniegebou in Pretoria gesê.
Die jeugliga het ’n memorandum van eise aan die regering oorhandig nadat sy optog eergister op die Beyers Naudé-plein in Johannesburg begin het.
Duisende jeugliga-aanhangers het die optog vir ekonomiese vryheid ondersteun deur per voet na die hoofstad op te ruk.
“Hierdie is nie die einde nie. Dit is maar net die begin,” het Malema gewaarsku.
Boaan die lys eise is die wysiging aan art. 25 van die Grondwet oor die reg op eiendom.
Ronald Lamola, adjunkleier van die jeugliga wat die memorandum voorgelees het, het gesê die regering moet grond sonder vergoeding kan onteien.
“Alle produktiewe grond moet genasionaliseer en verhuur word,” lui die memorandum.
Die jeugliga dring ook daarop aan dat ’n staatsbank gestig word en die oorsese beleid so gewysig word dat lande wat Suid-Afrika se soewereiniteit bedreig, geïsoleer word.
Daar word voorts aangedring op gratis gehalte-onderwys en ’n nuwe fonds “waaruit 10 000 studente jaarliks na die beste universiteite gestuur kan word”.
Malema het vroeër kapsie gemaak toe ’n onbekende regeringsverteenwoordiger gestuur is om die memorandum in ontvangs te neem.
Thulas Nxesi, nuwe minister van openbare werke, is toe vir dié taak gestuur.
Volgens die jeugliga het 25 000 mense oor die twee dae aan die optog deelgeneem.
Malema het die meer as 5 000 ondersteuners wat by die Uniegebou byeengekom het, geloof vir hul deursettingsvermoë.
“Ons het geskiedenis gemaak en julle het groot dissipline gewys. Daar is mense wat sê ons getalle is te min.
“Die mense wat dit sê kan nie eens reël dat 20 mense vir ’n verjaardag opdaag nie.
“Jul goeie gedrag is ’n teleurstelling vir baie mense wat die ergste voorspel het. Daar is nie eens ’n appel (gedurende die optog) gesteel nie.”
Hy het gesê die jeugliga besef die optog gaan nie meebring dat mense Maandag werk het nie.
“Die stryd begin nou eers. Ek hoop daar sal ’n dag aanbreek wat ons nie een plakkerskamp in die land het nie.”
– Volg Nuus24 op Twitter.
- Beeld