‘Dis makliker as Shaik se parool’
2012-01-01 07:47
Johannesburg – Dit sal vir die korrupte én siek voormalige polisiehoof Jackie Selebi selfs makliker as die bedrieër Schabir Shaik wees om vir mediese parool in aanmerking te kom.
Die Wysigingswet op Korrektiewe Kwessies wat in 2011 goedgekeur is, bepaal dié parool is nie net bedoel vir pasiënte soos Shaik wat “in die finale, terminale fase” is nie.
“Dit gaan makliker wees, want jy hoef nou nie meer besig te wees om dood te gaan nie,” het mnr. Julian Knight, ’n prokureur wat spesialiseer in paroolaangeleenthede, gesê.
Ingevolge die wysiging hoef ’n gevangene net aan te dui hy is “onkapabel”.
Van die ander oorwegings is die waarskynlikheid dat die gevangene dieselfde misdade sal kan herhaal en of sy mediese toestand doeltreffender buite die tronk behandel kan word.
Dr. Heleen Bierman, die spesialis wat Selebi in die Steve Biko- akademiese hospitaal behandel, het sy toestand as “kritiek” bestempel.
Selebi ontvang sedert 19 Desember chroniese nierdialise en sal na verwagting eers einde Januarie ontslaan kan word om in die mediese vleuel van die tronk verder behandel te word.
Behalwe dat Selebi waarskynlik nie gou in ’n tronksel sal beland om tronkstraf van 15 jaar weens korrupsie uit te dien nie, is sommiges ook ontsteld oor klaarblyklike voorkeurbehandeling vir Selebi.
Suné Kitshoff berig personeellede het glo opdrag gekry dat Selebi nie geboei mag word soos ander gevangenes nie.
Rapport verneem verder Selebi mag ’n onbeperkte aantal besoekers ontvang en hy het tot dusver verskeie regeringshoës langs sy bed gehad.
Mnr. Zacharia Modise van die departement van korrektiewe dienste het ontken Selebi ontvang voorkeurbehandeling.
Hy het ook benadruk ’n aansoek om mediese parool is nog nie ontvang nie.
Maar mnr. James Selfe, DA-woordvoerder oor korrektiewe dienste, sê hy en baie ander verwag so ’n aansoek in die afsienbare toekoms.
“Dit is amper déjà-vu (van die Shaik-saak). Die vonnisse is selfs dieselfde lengte. En in albei gevalle ontdek hulle ná die tyd ’n toestand wat nog nooit voorheen verklaar is nie.
“Die vraag wat ek het, is waarom Selebi nie sy siektetoestand as versagtende omstandighede aangevoer het tydens sy vonnisverrigtinge nie?”
Selfe sê dis waar dat die net nou baie wyer gespan is vir gevangenes wat in aanmerking kan kom vir mediese parool, maar dat wetgewing nou ook vereis dat onafhanklike mediese praktisyns die feite evalueer.
Daar is ook verskeie stappe in die aansoekproses wat dit moeiliker as in die verlede maak om amptenare ’n rat voor die oë te draai.
“Ons sal elke stap in die proses krities dophou.”
– Volg Nuus24 op Twitter
- Rapport