Dis Freek teen Riaan vir die nuus om 7
2010-06-26 08:30
Die Burger
Johannesburg - Die kykers van Afrikaanse TV-nuus sal binnekort kan kies by wie hulle die sewe-uur-nuus wil hoor: Riaan Cruywagen op SABC2 of Freek Robinson op kykNET.
’n Volwaardige nuusbulletin in Afrikaans word van vroeg in Augustus op kykNET uitgesaai – in die gewilde 19:00-tydgleuf waar Cruywagen al dekades lank ’n huishoudelike gesig is. Robinson, ook ’n SAUK-veteraan van langer as 30 jaar, sal kykNET se splinternuwe Afrikaanse nuusbulletin van Maandae tot Vrydae aanbied.
Die onafhanklike kanaal e.tv se 24-uur-nuuskanaal sal die Afrikaanse nuusbulletin saamstel, verpak en vir uitsending aan kykNET lewer. ’n Span wat van die land se voorste uitsaaijoernaliste insluit, val begin Julie by e.tv in om te begin voorberei vir die nuwe Afrikaanse TV-nuusbulletin wat in die eerste of tweede week van Augustus op die lug sal wees.
kykNET en e.tv se gesamentlike onderneming beteken Afrikaanse TV-kykers sal vir die eerste keer ooit ’n keuse hê oor waar hulle hul TV-nuus wil kyk.
e.tv se Engelse nuusbulletins het in die laaste tyd heelwat opgang gemaak, veral omdat dit as meer onafhanklik en vry van politieke inmenging beskou word.
Daarteenoor is Cruywagen die mees vertroude nuusleser in die land – by alle gemeenskappe. SABC2 se 19:00-bulletin is jare lank al die bulletin met die grootste kykertal in die land.
Benewens Robinson het e.tv twee ander bekende SAUK-joernaliste vir dié bulletin aangestel. Hulle is die RSG-omroepers LiMari Louw en JP Keyter.
Andries Cornelissen, ’n voormalige redaksielid van Die Burger en Beeld en tans besturende redakteur van nuus en sport by Jacaranda 94.2, is as nuusredakteur van die nuwe bulletin aangestel.
Gevra of die nuwe bulletin die SABC se kykers gaan probeer afrokkel, het Robinson gister gesê dit is moontlik.
“ ’n Mens gaan nie in die mark in as jy nie hoop om mense te trek nie, en die mense moet iewers vandaan kom.”
Robinson het ook gesê daar moet in gedagte gehou word dat die kanaal ’n beperkte gehoor het omdat DStv ’n betaaldiens is.
Volgens hom sal daar ná ’n “redelik uitgebreide vergadering van rolspelers” vandag meer besonderhede bekend wees.
Kaizer Kganyago, SAUK-woordvoerder, het aan Janice Keogh gesê die nuwe Afrikaanse nuusbulletin is geen kompetisie vir die SAUK nie.
“Die SAUK is ’n openbare uitsaaier. DStv saai net vir ’n spesifieke nismark uit.”
Kganyago het gesê hulle is nie bekommerd oor SAUK-joernaliste wat na e.tv geskuif het nie.
Die gesoute radio-en-TV-joernalis Lynette Francis gaan die program Praat saam soggens op RSG van Woensdag aanbied.
Robinson bied die program Dinsdag die laaste keer aan.
Volg Nuus24 op Twitter
- Die Burger