'Dirk soek aandag, is nie versteurd'
2010-01-27 08:38
Julian Rademeyer
Baranowitsji, Belarus - Dirk Prinsloo is eksentriek, buitensporig selfversekerd en wil altyd die middelpunt van aandag wees. Tog toon hy geen psigotiese neigings en ly hy nie aan ’n sielkundige ongesteldheid nie.
Dít is psigiaters by die Novinki- psigiatriese hospitaal in Minsk, die hoofstad van Belarus, se bevinding nadat hulle hom verlede jaar ondersoek het.
“Burger Prinsloo” het ’n “oordrewe siening van sy vermoëns” en is “ geneig om ’n vyandige houding teenoor ander mense in te slaan”.
Hy is ook geneig om “oorhaastig besluite” te neem en steur hom nie aan “negatiewe inligting wat sy selfbeeld aantas” nie.
Dié verslag is gister tydens Prinsloo se verhoor in die Baranowitsji-distrikshof uitgelees.
Psigiaters sê Prinsloo raak “geïrriteerd” wanneer hy nie aandag kry nie en “dwing sy standpunt aggressief op ander mense af”. Hy neem ook nie ander mense se belange in ag nie.
Tog meen die psigiaters Prinsloo kan sy optrede en die gevolge daarvan verstaan. “Prinsloo kan die aard en sosiale gevare van sy optrede verstaan.”
Tydens gister se hofverrigtinge het Prinsloo vir regter Vasiliy Petriv belowe: “Ek sal ’n soet seun wees.”
Dit kom nadat Petriv Prinsloo ’n week en ’n half gelede uit die hof gejaag het nadat die twee herhaaldelik koppe gestamp het.
Joernaliste by die hof is verbied om met Prinsloo te praat.
Toe die polisie hom gister ná die hofverrigtinge vinnig wegneem, het hy aan Die Burger se verslaggewer gesê: “Ek is bly julle kon kom.”
Prinsloo staan tereg op verskeie aanklagte wat spruit uit ’n mislukte bankroof op 10 Junie verlede jaar by ’n bank naby die woonstel waar hy gebly het. Hy is ook aangekla in verband met sy beweerde beledigende aanvalle op sy Belarussiese minnaresse.
Drie vroue is tydens die bankroofpoging aangerand. Prinsloo was na bewering met ’n speelgoedpistool, ’n kombuismes en ’n blikkie traanrook gewapen.
Prinsloo het gister gesê hy het tot sy sinne gekom toe hy geld agter die toonbank sien, asook bloedspatsels op die vloer van een van die vroue wat aangerand is.
“Op dié oomblik was ek geskok oor wat ek gedoen het en ek het die bank onmiddellik verlaat.”
Sy regsverteenwoordiger, Svetlana Abrosimova, het ’n verklaring in die hof uitgelees wat Prinsloo in Oktober verlede jaar afgelê het. Hy beweer daarin die polisie het hom “fisiek en geestelik” gemartel en gedwing om “talle feite te bevestig wat nie met my geheue strook nie”.
Hy het gesê die idee van ’n bankrooftog het ’n paar weke vantevore “herhaaldelik in my kop gekom”.
“Ek het gedink ek sal ’n klein bietjie geld van die kassier vat, maar niks van die kitsbank of die kluis nie.”
Hy het sy gedagtes oor ’n bankroofpoging “suksesvol onderdruk” tot die dag toe hy sy “sinne verloor het”.
As sy poging geslaag en hy die bank leeggesteel het, sou hy weggekom het met R58 000 in Bela-russiese roebel en R55 000 in Amerikaanse dollar. Tydens die bankroofpoging was daar ook R155 000 in Belarussiese roebel in die kitsbank. Daar was 46 g goud in die kluis, asook verskeie waardevolle items en effekte ter waarde van sowat R4 000.
Eksklusiewe beelmateriaal: Dirk Prinsloo in Belarus
– Die Burger