Dirk se appèl is tevergeefs
2010-11-12 00:20
Beeld
‘Dit is waar hy hoort.”
So het Susan Lemmer, ma van adv. Cézanne Visser, Donderdag gesê toe sy hoor dat die appèl van Dirk Prinsloo, haar dogter se eertydse minnaar, in Belo-Rusland teen sy vonnis van 13 jaar tronkstraf weens poging tot roof van die hand gewys is.
Dit beteken dat Prinsloo, ’n voormalige advokaat en oudvoorsitter van die onafhanklike balie in Gauteng, die res van sy vonnis in ’n strafkolonie in Belo-Rusland onder streng voorwaardes moet uitdien. Hy het op 10 Junie 2009 probeer om die Belo-Russiese bank in Baranowitsji te beroof.
Prinsloo het vroeër sy vonnis aan Beeld as “f****n mal” beskryf.
Die hof het ook gelas Prinsloo moet die koste van sy verhoor vergoed, ’n bedrag belasting aan die staat betaal en vergoeding van 5 miljoen roebel aan sy slagoffers betaal vir hul “morele en materiële skade” weens sy dade.
“As hulle Prinsloo langer daar (in die strafkolonie) kan hou, sal ek dit ook verwelkom,” het Lemmer gesê.
Haar dogter het op 17 Mei begin om haar vonnis van sewe jaar tronkstraf in die Pretoria-Sentraal-gevangenis uit te dien weens die onsedelike dade wat sy en Prinsloo met drie kinderhuismeisies en drie jong vroue gepleeg het.
Ook adv. Johann Engelbrecht, wat Visser (33) se verhoor in die hooggeregshof in Pretoria hanteer het, het gesê Prinsloo “verdien” sy vonnis.
“Ek is bly dat hy minstens ook nou ’n vonnis uitdien, al is dit nie in Suid-Afrika nie. Hy verdien die straf wat aan hom opgelê is; ek dink eintlik hy is lig gestraf,” het Engelbrecht gesê.
Prinsloo het in Mei 2006 in die middel van sy en Visser se verhoor na Belo-Rusland gevlug nadat hul verhouding verbrokkel het.
Volgens Engelbrecht het Visser goed aangepas en is sy ingeburger tussen haar medegevangenes.
Lemmer het gesê haar dogter het as Christen en as mens verdiep sedert sy haar tronkstraf begin uitdien het.
“Dit gaan met haar goed in die omstandighede,” het Lemmer gesê.
Visser, self ’n voormalige advokaat, kan van 16 November af kontakbesoeke in die gevangenis ontvang omdat sy dan reeds ses maande van haar vonnis uitgedien het.
Twee weke gelede het twee van haar slagoffers elk ’n skadevergoedingseis van R600 000 teen haar in die hooggeregshof ingedien. Die eisers was destyds tieners.
Een van die eisers (nou 24), ’n versekeringsklerk, sê in hofstukke Visser het haar op 22 Februarie 2002 aan pornografiese literatuur en rolprente, “intieme handelinge of terapie” wat op Visser se geslagsdele uitgevoer is en aan haar naakte liggaam blootgestel.
Volg Beeld op Twitter. Klik hier.