Dirk is 'eksotiese tronkvoël'
2009-08-09 16:34
Johannesburg - Dirk Prinsloo (40), Suid-Afrika se mees gesoekte voortvlugtige, sal eers ná 10 September weer in die hof in Belo-Rusland verskyn op aanklagte wat verband hou met ’n mislukte bankroof daar in Januarie.
Rapport het vasgestel dat die polisie-ondersoek teen dié datum afgehandel behoort te wees.
Dit lyk ook of die polisie Prinsloo nog nie met enige ander misdade kan verbind nie.
Volgens die departement van inligting in Belo-Rusland duur die ondersoek so lank omdat alle dokumente vir Prinsloo in Engels vertaal moet word aangesien hy nie Russies verstaan nie.
Prinsloo sukkel glo om aan te pas by die lewe agter tralies in dié voormalige Sowjet-republiek. ’n Hooggeplaaste bron na aan die ondersoek sê hy dring nog gereeld daarop aan om drie keer per dag te stort en wil ook baie graag sy eie skoene hê.
“Hy is nogal ’n eksotiese tronkvoël vir die ander aangehoudenes,” sê die bron.
Prinsloo het vroeër gesê hy sal graag ’n boek wil skryf oor sy lewe in Belo-Rusland, veral oor sy tronkervaring.
Hy is op 12 Junie in Baranowitsji vasgetrek nadat hy blykbaar twee dae tevore ’n bank met ’n speelgoedpistool en ’n mus probeer beroof het.
- Rapport
Vir meer hieroor, besoek Rapport.