Dirk Prinsloo uit hof gejaag
2010-01-14 07:28
Julian Rademeyer en Lyudmilla Prokopova
Johannesburg - Dirk Prinsloo is Woensdag in Belo-Rusland uit die hof verwyder nadat die regter hom vir die Suid-Afrikaner vererg het.
Regter Wasilij Petrif was nie ingenome met dié vermeende kinderseksmisdadiger se herhaaldelike uitbarstings en “irrelevante vrae” tydens die voorafgaande vyf uur se getuienis nie.
Prinsloo staan tereg op verskeie aanklagte van aanranding, marteling, diefstal, boewery en poging tot bankroof.
Petrif het bevind dat Prinsloo “sistematies die orde van die hof skend” en dat hy hom herhaaldelik skuldig gemaak het aan minagting van die hof.
Prinsloo mag nie weer in die Baranowitsji-distrikshof verskyn totdat alle getuies en “slagoffers” klaar getuig het nie. Prinsloo is deur polisiebeamptes geboei en weggeneem.
Dit het gekom terwyl getuienis gelei is oor sy beweerde betrokkenheid by ’n mislukte bankrooftog in Baranowitsji op 10 Junie verlede jaar.
Van die bankkassiere het gehuil toe hulle Woensdag getuig het.
Prinsloo het een van die vroue, wat tydens die mislukte rooftog aangerand is, in die hof om verskoning gevra.
Sy herhaaldelike onderbrekings terwyl Petrif die getuies ondervra het, het daartoe gelei dat hy verwyder is.
Vroeër het die hof gehoor hoe Prinsloo na bewering me. Anastasia Gomza, een van sy voormalige minnaresse, tussen Junie en Desember 2008 gereeld aangerand het.
Ná een aanranding het Prinsloo na bewering aan Gomza gesê dat sy sal goed lyk met silikoonlippe en -borste, is eergister volgens die Pretoria News getuig.
Die regter het Dinsdag al sy humeur met Prinsloo verloor tydens die Suid-Afrikaner se ondervraging van Gomza. Prinsloo het gesê dat hy in Suid-Afrika as ’n “briljante kruisondervraer” beskou is.
“Nou word ek deur u in die wiele gery,” het hy aan Petrif gesê.
Petrif het gereageer: “Ek stel nie belang in watter soort deskundige jy in Suid-Afrika was nie, jy is nou in Belo-Rusland.”
Later het Prinsloo gesê: “Ek wil nie langer deel wees van die verhoor nie. Dit is duidelik dat ek nie ’n regverdige verhoor kry nie.”
–Beeld