Dirk Prinsloo kan vandag hoor of hy gaan sit
2010-02-01 08:52
Julian Rademeyer
Minsk, Belo-Rusland - Dirk Prinsloo sal vandag weet of hy skuldig bevind is en of hy agter tralies in ’n maksimumsekuriteitstronk in Belarus sal moet sit.
Dié vermeende kinderseksmisdadiger staan tereg op aanklagte van poging tot bankroof, diefstal, marteling, doodsdreigemente en “boewery”. Hy kan tot 15 jaar tronkstraf opgelê word.
Prinsloo beweer hy is onskuldig op al die aanklagte behalwe bankroof, waarop hy toegee hy “gedeeltelik” skuldig is.
Regter Vasili Petrif begin vanmiddag in die Baranowitsji-distrikshof uitspraak lewer.
Verlede week het Prinsloo gesê hy is bereid om vergoeding vir “morele en materiële skade” aan die slagoffers by die bank te betaal, maar dat dít wat hulle vra (sowat R52 000 elk) te veel is. “Dink hulle ek het die Lotto gewen die dag toe ek by bank ingestap het?”
Prinsloo het ook beweer sy vervolging en verhoor is onwettig en dat die polisie nie die regte prosedure gevolg het nie. Hy het ook beweer dat hy gemartel is – ’n aanspraak wat die hof Vrydag verwerp het.
Volgens Prinsloo het die polisie ook met getuienis gepeuter en getuies voorgesê.
Prinsloo ontken ook dat hy sy minnaresse “geestelik en fisiek” aangerand en gemartel het, of dat hy ’n halssnoer ter waarde van $2 000 (R15 110) by een van hulle gesteel het. Hy beweer hul “leuens” is gemotiveer deur “jaloesie”.
Luidens ’n verklaring wat Vrydag in die hof voorgelees is, wil die seuntjie wat die polisie gehelp het om ’n identikit van Prinsloo saam te stel ná die mislukte rooftog, “nie weer die man sien nie want ek is bang vir hom”.
Artjom Bobrovitsj (10) beskryf hoe Prinsloo sy ma buite die bank herhaaldelik met die vuis geslaan het toe hy ná sy beweerde mislukte rooftog uit die bank gevlug het.
Artjom en sy ma, Angela Bobrovitsj, het hul hond saamgeneem bank toe.
“Dit was omtreeks 14:15 en mamma het my buite gelos met die hond sodat sy in die bank kon gaan. Toe sy die trappe klim was daar skielik ’n man met ’n masker oor sy gesig. Ek het nie gehoor dat hy enigiets sê nie.
“Hy het my mamma aangeval en haar op die kop en in die maag met sy vuiste geslaan. Hy het haar sowat vier keer geslaan. Sy het teen die muur gesak en op die grond geval. Die man het stadig geloop en die masker van sy kop afgehaal.
“Ek het ’n mes in sy hand gesien. In die ander hand was ’n sak. Daar was geen rede om my mamma te slaan nie. Ek was baie bang en het weggehardloop en in die portaal van ’n gebou gaan wegkruip.”
Artjom het vir die polisie gesê die verdagte “lyk soos ’n nar met ’n wye neus en groot oë”.
Later het Artjom “onmiddellik” vir Prinsloo uitgeken toe hy ’n foto van hom gewys is.
Volgens Prinsloo is Artjom se weergawe “pure fantasie”.
“Toe ek die bank verlaat het was daar nie ’n seun met ’n hond buite nie. Hy kon dalk in die omgewing gewees het maar nie naby nie.”
- Die Burger