Dirk Prinsloo het glo gemartel en bespot
2010-01-13 07:23
Minsk - Dirk Prinsloo is ’n gewelddadige man wat vroue mishandel, met die dood dreig, martel en beroof, voer die staat aan in die Baranowitsji-distrikhof waar Prinsloo op aanklagte van onder meer poging tot roof en boewery teregstaan.
Die Pretoria News, wat ’n verslaggewer na Belarus gestuur het, het berig een van die getuies, Prinsloo se voormalige vriendin Anastasia Gomza, gaan volgens die klagstaat getuig dat hy haar aangerand en “gemartel” het en haar ook met die dood gedreig het.
Luidens die berig lui die klagstaat dat Prinsloo haar in Desember 2008 ernstig aangerand het in haar woonstel in Minsk, Belarus se hoofstad.
Hy het toe na bewering foto’s van haar wonde geneem en haar sarkasties daarmee bespot.
Die koerant berig voorts Prinsloo het Gomza luidens verklarings voor die hof by minstens twee geleenthede aan die hare gegryp, rondgesleep en haar op die vloer neergegooi.
Gomza het volgens die koerant die regter versoek dat haar getuienis nie in ’n ope hof aangehoor moet word nie omdat dit haar “waardigheid sal aantas”.
Die regter het haar versoek geweier.
Prinsloo het ook geëis dat hy afskrifte van hofdokumente en die polisielêer in Engels wil hê.
Toe die regter hom gevra het of hy daarvoor kon betaal, het Prinsloo hom sy geskeurde jas gewys en gesê: “Lyk dit asof ek geld het?”
Prinsloo het eergister nog geweier om te pleit omdat hy glo nie kans gehad om deur ’n tolk met sy prokureur, me. Swetlana Abrosimova, te konsulteer nie.
Prinsloo het ook die regter en sy assessore gevra om hulle aan die saak te onttrek omdat hulle klaarblyklik “bevooroordeeld en uiters geïrriteerd” met hom is.
Prinsloo is gewaarsku dat sy gedrag neerkom op minagting van die hof.
Volgens Lyudmilla Prokopova, Die Burger se korrespondent, het Prinsloo, wat soms in gebroke Russies gepraat het, ’n groot Engels-Russiese woordeboek, verskeie lêers, dokumente en ’n sak nartjies by hom gehad.
Die saak duur voort.
- Die Burger