Dirk Prinsloo gehok in hof
2010-01-12 07:56
Lyudmila Prokopova en Julian Rademeyer
Minsk - Hy verstaan nie wat aangaan nie en hy verstaan nie hoekom niemand na hom luister nie, het Dirk Prinsloo, Suid-Afrika se vermeende kinderseksmisdadiger, gister in ’n hof in Belarus gesê.
Prinsloo se verhoor op aanklagte wat verband hou met ’n bankroof het Maandag begin. Hy het onder meer daarop aangedring dat die verhoor met geslote deure gehou moet word.
“Ek verstaan nie mooi wat hier aangaan nie en ek vra dat die regter my meer deeglik moet toespreek,” het Prinsloo glo tydens die verrigtinge gesê.
Hy wou ook weet hoekom niemand na hom luister nie.
Prinsloo se hande was agter sy rug geboei en hy was omring deur polisiebeamptes toe hy gister by die Baranowitsji-distrikshof aangekom het.
Hy is tydens die verrigtinge in ’n staalhok toegesluit en moes met sy prokureur, Svetlana Abrosimova, deur die tralies praat.
Prinsloo staan tereg op aanklagte van poging tot moord, aanranding met die opset om ernstig te beseer, roof en wanordelike gedrag. Hy kan tot tien jaar tronkstraf kry indien hy skuldig bevind word. Daarna sal hy na Suid-Afrika gedeporteer word.
Hy het daarop aangedring dat sy tolk vervang word en dat sy verhoor met geslote deure plaasvind om sy dogter, Xenia, te beskerm.
Albei sy aansoeke is van die hand gewys.
Prinsloo het geweier om te pleit, het die Star-koerant Dinsdag berig.
Prinsloo is op 12 Junie verlede jaar in Belarus se hoofstad, Minsk, in hegtenis geneem ná ’n mislukte bankroof in Baranowitsji, nie ver van die woonstel waar hy, sy vriendin en hul jong dogtertjie gebly het nie.
Prinsloo het in 2006 na Belarus gevlug om sy verhoor in Suid-Afrika vry te spring.
Sy medebeskuldigde, Cézanne Visser, is in Oktober verlede jaar skuldig bevind op 11 van die 14 seksaanklagte teen haar. Sy word op 8 Februarie gevonnis.
Volgens die polisie in Belarus het Prinsloo twee weke voor die bankroof ’n speelgoedpistool en ’n klapmus gekoop. Hy het ’n mes saamgevat wat hy in Suid-Afrika gekoop het. Hy het dié mes glo altyd by hom gehad, selfs as hy geslaap het.
Prinsloo het glo die telefoondrade in die bank met ’n snoeiskêr afgeknip en die deur versper met ’n metaalstaaf wat in papier toegedraai was.
Toe hy by die bank instorm, het hy glo ’n plakkaat met die woorde “Geld op tafel” vir die kassiere gewys. Later het hy volgens die polisie erken hy het die boodskap met die hulp van ’n elektroniese sakvertaler geskryf.
Volgens die polisie was daar ’n kluis en geld by die kassiere, maar die “dapper” vroue het botweg geweier om dit aan Prinsloo te oorhandig.
Hy het ’n kassier glo aangerand en gevlug toe ’n ander kassier die alarm geaktiveer het. Op pad uit het hy na bewering ook ’n vroulike kliënt van die bank aangerand.
Volgens die koerant Intex-Press is vier bankwerkers beseer. Een vrou is geslaan en geskop en daar is op ’n ander getrap. Een vrou moes glo neurochirurgiese behandeling kry.
Prinsloo se vingerafdrukke was blykbaar oral in die bank.
Hy is twee dae later in ’n internetkafee in Minsk vasgetrek.
- Die Burger