Dirk Prinsloo aangekla
2009-12-11 08:51
Julian Rademeyer
Johannesburg - Die vermeende kinderseksmisdadiger Dirk Prinsloo is in die voormalige Sowjetrepubliek van Belarus amptelik van poging tot roof, boewery en seksmisdade met tienermeisies aangekla.
Die aanklagte is gister amptelik in ’n hof in die stad Brest ingedien.
Prinsloo se verhoor sal na verwagting vroeg volgende jaar begin.
Hy is in Junie in Minsk, hoofstad van Belarus, in hegtenis geneem nadat hy na bewering by ’n mislukte bankrooftog betrokke was.
Prinsloo het glo ’n bank probeer beroof in ’n klein dorpie naby die woonstel waar hy geskuil en saam met sy vriendin van Belarus en hul eenjarige dogter gewoon het.
Die polisie daar het in September aan Die Burger bevestig dat Prinsloo – wat deur sy voormalige minnares Cezanne Visser se advokaat as ’n “seksuele sadis” bestempel is – ondersoek word in verband met “verskeie seksmisdade in Minsk”.
Volgens die hoof van Interpol in Belarus, lt.kol. Mikhail Starikovich, hou die nuwe bewerings verband met Prinsloo se beweerde “seksuele perversies” met vorige vriendinne.
Prinsloo se pa, Johan Prinsloo, het gister gesê sy seun het in ’n onlangse brief geskryf die toestande in tronke in Belarus is “baie swakker” as in Suid Afrika.
“Dit is vuil, armoedig en gevangenes kry die mees basiese kos. Dit is onsmaaklik en rumoerig. Dit is doodeenvoudig morsig en vuil.”
Hy het gesê sy seun het ’n prokureur en hoop dat hy ’n regverdige verhoor sal kry.
“Ek lei af dat hy wel kontak het met sy prokureur en dalk sal hy (Prinsloo) probeer leiding gee, want hy ken hofprosedures. Maar dit hang af. Die oomblik wanneer hulle nou in hul eie taal die dinge moet oordra, weet jy nie of dit so gedoen word op die einde nie.”
Prinsloo sr. het gesê sy seun praat min Russies en dit maak die saak moeiliker vir hom.
Volgens hom sal Prinsloo jr. in Januarie vir die eerste keer sedert sy inhegtenisneming in ’n hof verskyn.
Visser sal dié Kersfees nog tuis kan vier.
Sy sal eers volgende jaar gevonnis word vir die seksmisdade wat sy met jong vroue en kinderhuismeisies gepleeg het.
Waarnemende regter Chris Eksteen het Dinsdag in die Noord-Gautengse hooggeregshof in Pretoria die vonnisverrigtinge tot 8 Februarie uitgestel.
- Die Burger