Diewe in Alberton loop hul rieme styf

2012-08-08 23:00

Johannesburg – Drie mans is Woensdag in Alberton in hegtenis geneem ná  'n mislukte huisbraak, het die Ekurheleni-metropolisie gesê.

Polisiewoordvoerder Wilfred Kgasago het gesê die rowers het 'n bejaarde egpaar met messe aangehou terwyl hulle die slagoffers se huis geplunder het.

Die egpaar kon dit regkry om die polisie te kontak.

"[Die polisie] het gereageer op 'n noodoproep na die Brackendowns-stasie en was binne 10 minute op die toneel," het Kgasago gesê.

Drie mans tussen die ouderdomme van 25 en 29 jaar is dadelik in hegtenis geneem, maar 'n vierde verdagte het weggekom.

Die polisie het juwele, R1 000 en drie messe by die vermeende diewe afgevat.

"Die slagoffers het mediese behandeling ontvang vir ligte beserings wat hulle tydens die voorval opgedoen het," het Kgaso gesê.

Die drie mans sal Vrydag in die Palm Ridge-landdroshof verskyn.

Volg Nuus24 op Twitter.

       

- SAPA