Diepkloof rustig ná betogings
2011-07-02 13:28
Johannesburg – Diepkloof in Johannesburg was stil Saterdagoggend nadat betogers paaie versper en bande aan die brand gesteek het as gevolg van kragonderbrekings, het polisie in Gauteng gesê.
“Hulle het Vrydagaand rustig geraak. Daar was geen geweld nie en niemand is in hegtenis geneem nie,” het kapt. Nondumiso Mpantsha gesê.
Sy het gesê verteenwoordigers van Eskom het Vrydagaand met die betogers gaan gesels en hulle het kort daarna tot ruste gekom.
Betogers het Donderdag en Vrydag paaie versper en bande aan die brand gesteek.
Dele van Marthinus Smuts-straat, Immink-rylaan en Beyers Naude-rylaan was gesluit sodat die verkeer nie naby die betogings verby hoef te beweeg nie.
Mpantsha het gesê die polisie is steeds op die toneel.
– Volg Nuus24 op Twitter