Die gereg bots, en jy betáál
2010-02-13 06:58
Cobus Claassen
Pretoria - Die Tshwane-metropolisie is in een ná die ander botsing en ongeluk betrokke en die herstelwerk kos die belastingbetaler miljoene rande.
Herstelwerk aan voertuie van die metropolisie het verlede jaar meer as R1,6 miljoen beloop.
Beeld het gister ’n interne dokument bekom wat beklemtoon hoeveel voertuie verlede jaar ’n draai by die paneelklopper gemaak het.
Karen Meyer, die DA se woordvoerder vir gemeenskapsveiligheid, het gister gesê die party sal graag wil weet hoekom so baie voertuie beskadig word.
“En wat gaan gedoen word om te verhinder dat die tendens hom vanjaar herhaal?”
Die dokument toon altesame 98 voertuie is van Julie verlede jaar tot November verlede jaar beskadig.
Dit kom op byna 20 voertuie ’n maand neer.
Die herstelwerk aan die 98 voertuie in dié vyf maande het meer as R1,2 miljoen gekos. Net in Oktober is R480 559 daarvoor opgedok.
Meyer het gesê dit is onrusbarend dat die metropolisie se BBP-eenheid in 16 van die botsings of ongelukke betrokke was wat herstelwerk van amper R295 000 behels het. Een BBP-voertuig is ook afgeskryf.
Bongi Lehobye, Tshwane se burgemeesterskomiteelid vir gemeenskapsveiligheid, het gesê sy sal eers die statistieke onder oë moet kry voordat sy kan kommentaar lewer.
“Ek weet van ’n ongeluk hier en daar, maar ek sal nie kan sê of dit hoog is of nie.”
Lehobye het gesê sy sal Maandag op Beeld se vrae reageer.
- Beeld