Dewani se geestestoestand 'verbeter'

2012-09-18 15:42

Londen – Die geestestoestand van Shrien Dewani is besig om te verbeter, het ‘n Britse hof Dinsdag gehoor.

Dié verwikkeling kan moontlik sy uitlewering na Suid-Afrika bespoedig sodat hy tereg kan staan op aanklagte van die moord op sy vrou, Anni.

Dewani (32) word by ‘n privaat psigiatriese inrigting behandel en het in Julie beweer dat hy ‘n jaar nodig het om vir depressie behandel te word voordat hy na Suid-Afrika uitgelewer kan word.

Nietemin sê sy psigiater Dewani se geestestoestand het “verbeter,” het die Westminster-magistraatshof gehoor.

“Dit word nou beskryf as matig eerder as ernstig,” het Hugo Keith, prokureur vir die Suid-Afrikaanse regering, aan die hof gesê.

“Hy ly steeds aan post-traumatiese stressindroom,” het hy bygevoeg.

Dewani, wat enige betrokkenheid in sy vrou moord ontken, is in April 2011 na ‘n psigiatriese inrigting geneem weens vrese dat hy kan selfmoord pleeg.

Sy 28-jarige vrou is in 2010 doodgeskiet toe die taxi waarin sy en Dewani gery het in Gugulethu in Kaapstad gekaap is.

– Volg  Nuus24 op Twitter 

- AFP