Dewani sal geskik wees vir verhoor, hoor hof
2011-12-15 12:45
Johannesburg – Die Britse sakeman Shrien Dewani sal geskik wees om in Suid-Afrika verhoor te word, het 'n hof in Londen gehoor.
Adv. Hugo Keith QC, namens die Suid-Afrikaanse owerhede, het Woensdag in die hooggeregshof aangevoer dat Dewani goeie psigiatriese sorg sal ontvang indien hy na Suid-Afrika uitgelewer sal word.
The Star het berig dat Keith verwys het na 'n onlangse verslag van Dewani, wat sê "sy geestestoestand sal verbeter... dit is hoogs onwaarskynlik vir gevalle van depressie en/of post-traumatiese stresstoornis om nie in die medium- of langtermyn te verbeter nie".
Die twee regters het die saak laat afstaan.
Dewani word daarvan beskuldig dat hy die moord op sy vrou, Anni Dewani, in November verlede jaar tydens hul wittebrood in Kaapstad, georkestreer het.
Die taxibestuurder Zola Tongo het ‘n pleitooreenkoms met die staat aangegaan en erken hy het Dewani gehelp om die moord te beplan.
Tongo is reeds tot 18 jaar tronkstraf gevonnis.
Die Britse minister van binnelandse sake, Theresa May, het Dewani se uitleweringsbevel in September onderteken.
– Volg Nuus24 op Twitter
- SAPA