Dewani-moordenaar 'geskok' oor vonnis

2012-12-05 13:53

Kaapstad – Xolile Mngeni het met skok gereageer ná die stad se hooggeregshof hom tot lewenslange tronkstraf gevonnis nadat hy Anni Dewani doodgeskiet het.

Hy is ook 15 jaar tronkstraf opgelê vir roof met verswarende omstandighede, terwyl hy vyf jaar tronkstraf gekry het vir die besit van ‘n ongelisensieerde vuurwapen en ammunisie. Dié vonnisse sal saam met sy lewenslange gevangenisstraf uitgedien word.

Regter Robert Henney het verlede week die man skuldig bevind.

Mngeni het geskok gelyk toe die vonnis voorgelees is. Sy oë was wawyd oop en sy mond het oopgehang.

Dewani (28) se pa, Vinod Hindocha, het na die veroordeelde moordenaar gestaar, maar hulle het nie oogkontak gemaak nie.

Die oorledene is op 13 November 2010 ontvoer, beroof en doodgeskiet. Haar lyk is die volgende dag gevind.

Haar man, Shrien, word daarvan beskuldig dat hy die moord gereël het.

Volg Nuus24 op Twitter

- SAPA