Dewani-moord: NVG gelukkig met uitspraak

2012-11-20 11:37

Kaapstad – Die Nasionale Vervolgingsgesag (NVG) sê hy is tevrede met die uitspraak teen Anni Dewani se moordenaar, Xolile Mngeni.

Mngeni (25) is daaraan skuldig bevind dat hy die toeris twee jaar gelede tydens haar wittebrood in ‘n beweerde kaping doodgeskiet het.

Die veroordeelde moordenaar, wat aan kanker ly, is op aanklag van ontvoering vrygespreek.

Eyewitness News berig die NVG se Eric Ntabazalila het die uitspraak verwelkom.

“Ons is tevrede met die uitspraak, veral met die regter se oortuiging dat die NVG bo redelike twyfel bewys het dat Xolile Mngeni... die sneller getrek het.”

Twee van Mngeni se medebeskuldigdes, Zola Tongo en Mziwamadoda Qwabe, dien reeds tronkstraf uit vir hul aandeel in die moord.

Tongo en Qwabe het die oorledene se man, Shrien, by die moord betrek en gesê hy het die moord beplan.

Volgens buitelandse berigte sal sy uitleweringsverhoor op 3 Desember voortduur.

Volg Nuus24 op Twitter