Dewani-moord: Mngeni sit lewenslank

2012-12-05 11:39

Kaapstad – Die man wat van die moord op Anni Dewani skuldig bevind is, is Woensdag tot lewenslange tronkstraf gevonnis.

Regter Robert Henney het Xolile Mngeni (25) vroeër op aanklagte van moord en roof skuldig bevind nadat die beskuldigde vroeër op al die aanklagte teen hom onskuldig gepleit het. Henney het hom egter op aanklag van ontvoering vrygespreek.

Mngeni is daarvan aangekla dat hy die toeris op 13 November 2010 ontvoer, beroof en doodgeskiet het. Sy is tydens haar wittebrood in Gugulethu vermoor.

Dewani se man, Shrien, wat ook by die moord betrek word, veg steeds teen sy uitlewering aan Suid-Afrika. Hy word daarvan aangekla dat hy die moord op sy vrou gereël het.

'n Britse magistraat het vroeër sy uitleweringsverhoor tot Julie aanstaande jaar uitgestel.

Die hof het gehoor dat die verdagte aan erge post-traumatiese stres ly en dat hy terugflitse ervaar van die aand waarop sy vrou vermoor is.

Die ander medebeskuldigdes, Zola Tongo en Mziwamadoda Qwabe, dien reeds tronkstraf uit vir hul aandeel in die moord.

Qwabe het vroeër in sy pleitooreenkoms erken dat hy die oorledene saam met sy medebeskuldigdes ontvoer het.

Luidens sy pleitooreenkoms het mnr. Dewani die moord gereël, waarna Mngeni die sneller getrek het.

Volg Nuus24 op Twitter.

- SAPA