Dewani-moord: Getuie was glo middelman

2012-08-16 07:19

Johannesburg – Die verhoor van een van die mans wat beskuldig word van die moord op Anni Dewani sal Donderdag in die Wes-Kaapse hooggeregshof voortgaan.

Dewani (28) is in November 2010 in ‘n vermeende motorkaping geskiet terwyl sy saam met haar man Shrien op wittebrood was.

‘n Getuie het Woensdag erken dat hy die middelman was en die taxibestuurder Zola Tonga bekend te stel aan ‘n man wat meer van die onderwêreld geweet het.

Tonga het die getuie op 12 November 2010 gebel om te vra of hy weet van ‘n huurmoordenaar.

Hy het gesê hy ken nie iemand nie, maar hy kan vir hom die nommer gee van Abongile, ‘n voormalige medewerker wat voorheen al gesê het hy sal hom “help” as iemand agter hom aan is.

Tongo het die getuie kort daarna in sy silwer Volkswagen Sharan ontmoet waar hy vertel het hoe ‘n buitelandse man hom gevra het om hom te help om ‘n huurmoordenaar te kry.

Die getuie was ‘n hotelwerker wat Tongo geken het aangesien die hotel gereeld van Tongo se vervoermaatskappy gebruik gemaak het vir toere en ritte na die lughawe.

Hy was as ‘n tussenganger gebruik om boodskappe oor te dra.

Die naam en identiteit van die getuie is weerhou ná ‘n bevel deur regter Robert Henney om hom teen enige skade of intimidasie te beskerm.

Tongo het in ‘n pleitooreenkoms beweer dat Dewani voorheen gereël het dat iemand in ‘n vervalste motorkaping in Suid-Afrika vermoor word.

Tongo het 18 jaar tronkstraf gekry vir sy rol in die komplot.

Een van die beskuldigdes, Xolile Mngeni, het vroeër onskuldig gepleit op aanklagte van ontvoering, roof en moord, sowel as die onwettige besit van ‘n vuurwapen en ammunisie.

– Volg Nuus24 op Twitter

 

- SAPA