Dewani-moord: 32 getuies in hof verwag
2012-08-15 22:53
Kaapstad – Die man wat daarvan aangekla word dat hy Anni Dewani vermoor het, het skuld ontken op al die aanklagte teen hom.
Xolile Mngeni, wat daarvan beskuldig word dat hy die sneller getrek het, se hofsaak het uiteindelik in die Kaapstadse hooggeregshof afgeskop ná maande se voorverhoorkonferensies.
Mngeni staan tereg op aanklagte van moord, ontvoering, roof en die onwettige besit van ‘n vuurwapen en ammunisie.
Sy medebeskuldigde, Mziwamadoda Qwabe, is verlede week tot 25 jaar tronkstraf gevonnis nadat hy skuld erken het.
Qwabe sê hulle is R15 000 betaal om Dewani in 2010 te vermoor.
Aanklaers het Woensdag in die hof onthul dat 32 getuies in die saak sal getuig, het Eyewitness News berig.
Die eerste getuie, wat nie genoem mag word nie, het aan die hof gesê hy het in 2010 by ‘n Kaapstadse hotel gewerk.
Hy het vertel hoe Zola Tongo, ‘n taxi-bestuurder, hom genader het. Volgens die getuie was Tongo op soek na ‘n sluipmoordenaar.
Die getuie sê Tongo het vir hom gesê ‘n buitelandse man – wat nou as Shrien Dewani geïdentifiseer word – wou ‘n vrou laat vermoor.
Die saak duur voort.
Volg Nuus24 op Twitter
