Dewani 'hét geestesiekte'
2011-12-14 09:30
Den Haag – Shrien Dewani (31) kan weens sy geestesiekte nie reken op ’n regverdige verhoor in Suid-Afrika nie.
Dewani is boonop só siek dat hy nóg ses maande kragtens die Wet op Geestesgesondheid aangehou kan word en dat hy ’n hoë selfmoordrisikogeval sal wees indien hy aan Suid-Afrika uitgelewer word.
Só het Dewani se regsverteenwoordiger, Claire Montgomery QC, gister luidens berigte in die Britse media in die Britse hoër hof in Londen aangevoer.
Dewani word aangekla van die kontrakmoord op sy vrou, Anni (28), in November verlede jaar in Guguletu in Kaapstad.
Die Dewani’s was op wittebrood in die Kaap toe hul taxi glo gekaap is. Me. Dewani se lyk is later in die verlate voertuig in Ilithapark, Khayelitsha, gevind. Dewani is in Guguletu uit die voertuig gegooi.
Die Britse minister van binnelandse sake, me. Theresa May, het in September ’n uitleweringsbevel onderteken.
Dewani se appèl teen die uitleweringsbevel het gister voor regters sir John Thoma en sir Ducan Ousely begin en gaan vandag voort.
Montgomery voer aan dat Dewani aan post-traumatiese stressindroom ly en dat hy nie voorgee dat hy aan dié geestesiekte ly nie.
Sy uitlewering kan glo sy gesondheid en selfs sy lewe bedreig.
Volgens haar kan Dewani nie alleen op grond van sy siektetoestand nie op ’n regverdige verhoor in Kaapstad reken nie; hy loop ernstige gevaar om deur mede-gevangenes aangerand of verkrag te word.
Sy het gesê die versekerings van die Suid-Afrikaanse owerheid dat Dewani in die tronk beskerm sal word, is nie genoeg nie.
Montgomery het die twee regters gevra om die uitlewering te keer, ten minste tot ’n later geleentheid wanneer sy geestestoestand weer geëvalueer kan word.
Dewani het nie die hofverrigtinge bygewoon nie. Enkele van sy familielede was wel daar.
’n Taxibestuurder van Kaapstad, Zola Tonga, is kort ná die moord in hegtenis geneem. Hy is op 8 Desember 2010 in die Wes-Kaapse hooggeregshof ná ’n pleitooreenkoms met die staat tot 18 jaar tronkstraf gevonnis vir sy aandeel in die moord.
Hy het beweer dat Dewani die meesterbrein agter die moord op Anni is en dat hy R15 000 betaal is om haar te laat vermoor.
– Volg Nuus24 op Twitter
- Die Burger