Dewani-beskuldigde se afdrukke op moordvoertuig
2012-08-21 22:56
Kaapstad – Een van die beskuldigdes in Anni Dewani se moordsaak, Xolile Mngeni, se palm-afruk is op die voertuig gevind waarin Dewani vermoor is, het die Wes-Kaapse hooggeregshof Dinsdag gehoor.
Ao. Johan Hanekom, ‘n kenner in vingerafdrukke, sê daar is geen twyfel by hom dat die linker palm-afdruk wat hy op die silwer Volkswagen Sharan gekry het die beskuldigde s’n is nie.
Hanekom is die derde getuie in die saak. Hy sê hy het die voertuig op 14 November 2010 ondersoek.
Dewani is op 13 November 2010 in ‘n vermeende motorkaping doodgeskiet terwyl sy in Kaapstad op wittebrood was saam met haar man Shrien.
Mngeni was glo die man wat die sneller getrek het. Hy het onskuldig gepleit op aanklagte van ontvoering, roof met verswarende omstandighede, moord en die onwettige besit van ‘n vuurwapen en ammunisie.
Hanekom sê hy het twee palm-afdrukke aan die bestuurder se kant van die motor gevind, een op die voorste modderskerm, die ander op die enjinkap. Die palms het na die agterkant van die voertuig gewys.
‘n Kopie van Mngeni se afdrukke is op 13 Augustus hierdie jaar deur kapt. Paul Hendrikse aan hom gegee. ‘n Vars stel afdrukke is Dinsdagoggend van Mngeni geneem.
Die afdrukke is deur ‘n vingerafdruk-stelsel gestuur wat moontlike ooreenstemmings getoon het. Hanekom het dit geanaliseer en het nege ooreenkomste opgemerk terwyl hy na een spesifieke afdruk gekyk het.
Slegs sewe was nodig om ‘n ooreenstemming te bevestig. Twee ander kenners het die ooreenkomste bevestig.
– Volg Nuus24 op Twitter
- SAPA
