Dewani-beskuldigde glo deur polisie aangerand

2012-09-17 14:28

Kaapstad – ‘n Man wat verhoor word vir die moord op Anni Dewani is in die keldervertrek van ‘n polisiegebou aangerand en gemartel, het die Wes-Kaapse hooggeregshof Maandag gehoor.

Xolile Mngeni is kort ná sy inhegtenisname op 16 November 2010 na die kelderverdieping van die Valke se gebou in Bellville gelei, het sy prokureur, Qalisile Dayimani, gesê.

Daar is sy hande agter aan ‘n stoel vasgeboei en hy is erg aangerand en geslaan deur konst. “Mbali”.

“Die beskuldigde se testikels is in ‘n lessenaarlaai vasgeslaan en ‘n sak is oor sy kop geplaas,” het die prokureur aan die hof gesê.

Mngeni word verhoor vir die kaping, roof en moord op Dewani in Gugulethu op 13 November 2010.

Sy en haar man Shrien was op hul wittebrood in Kaapstad.

Die polisieman wat Mngeni in hegtenis geneem het, lt.kol. Bonginkosi Kwinana, is onder kruisverhoor deur die verdediging.

Kwinana se getuienis maak deel uit van ‘n verhoor binne ‘n verhoor om vas te stel of ‘n “erkentenis” deur Mngeni ingedien kan word as bewyse.

Hy het herhaaldelik enige aantygings van aanranding ontken.

– Volg Nuus24 op Twitter

 

- SAPA