Deur hou sleutelbewyse in Oscar-saak

2013-02-25 10:32

Durban – Oscar Pistorius se regspan wag geduldig op die geleentheid om die deur waardeur die model Reeva Steenkamp geskiet is, van nader te bekyk, berig The Mercury.

Volgens die regspan is dit een van die mees kritieke bewysstukke wat nog uitstaande is. Die deur is deur die polisie verwyder voor Pistorius se span kans gehad het om die misdaadtoneel te fynkam.

Reggie Perumal, 'n forensiese patoloog van Durban wat deur die verdediging aangestel is, het gesê die staat het ná Pistorius se borgtogaansoek aangedui dat hy die deur onder die vergrootglas sal plaas.

"Dit is belangrik dat ons die deur van nader bekyk sodat ons die trajek van die koeëls kan bepaal en vasstel presies waar in die toilet sy was toe sy geskiet is. Naas die uitslae van die nadoodse ondersoek, is dit die belangrikste inligting wat ons benodig."

Perumal, wat teenwoordig was by Steenkamp se nadoodse ondersoek en meer as 200 foto's geneem het, het gesê baie van die geugte oor die misdaad en die gebeure wat daartoe gelei het, is maklik uitgeskakel.

Pistorius is Vrydag borgtog van R1 miljoen toegestaan.

– Lees meer hier

– Volg Nuus24 op Twitter