Despatch: 2 mans doodgeskiet
2012-01-14 12:51
Johannesburg – Twee mans is in Despatch doodgeskiet en 'n ander gewond, het die Oos-Kaapse polisie Saterdag gesê.
Die lyk van 'n 20-jarige man is omstreeks 07:00 langs Elandstraat gevind, het lt.kol. Priscilla Naidu gesê.
Die man het op sy maag gelê, en het skietwonde agter sy regteroor en op sy wang gehad.
Die polisie het omstreeks 08:00, terwyl hulle op die toneel besig was, verdere inligting ontvang oor twee ander slagoffers wat in 'n bos naby Swartkopstraat gevind is.
Mense van die omgewing het na die bos gegaan om te bid toe hulle op die slagoffers afkom, het Naidu gesê.
Een van die mans, 25, het 'n skietwond aan sy kop gehad. 'n Ander man, 24, is naby hom gevind met 'n skietwond aan sy linkerhand en 'n wond aan sy kop.
Die 24-jarige man het steeds gelewe, en is na 'n hospitaal geneem. Die twee mans is ongeveer 'n kilometer van die toneel af gevind.
Al drie die mans was van die Ezinyoka-nedersetting naby Despatch.
"In hierdie stadium weet ons nie wat die motief vir die skietery is nie. Ons weet nog nie of die drie mans mekaar ken nie," het Naidu gesê.
"Die polisie vermoed die drie mans is laat gisteraand [Vrydagaand] geskiet. Die polisie het die twee moorde met mekaar verbind. Enigiemand wat kan help met enige inligting wat verband hou met die voorval word gevra om asseblief met die SAPD se Despatch-tak in verbinding te tree," het sy gesê.
– Volg Nuus24 op Twitter.