Derby-Lewis daag minister uit oor 'leuen'
2011-12-20 09:54
Sonja Carstens
Pretoria – Clive Derby-Lewis (74) het gister vanuit die Pretoria-sentraal-gevangenis, waar hy die afgelope 18 jaar sy vonnis van 25 jaar tronkstraf uitdien, die minister van korrektiewe dienste uitgedaag om haar stellings oor hom te bewys.
Derby-Lewis het gereageer op Nosiviwe Mapisa-Nqakula, minister van korrektiewe dienste, se stelling op die opening van die galgkamer-museum verlede week dat Derby-Lewis twee jaar gelede in ’n paroolaansoek gesê het as hy uit die tronk kom, gaan hy eers rus en daarna alles oor die moord op Chris Hani onthul.
“Hoekom nie nou nie,” wou Mapisa-Nqakula weet.
Derby-Lewis het gister in ’n verklaring, wat deur sy vrou, Gaye, aan Volksblad gestuur is, gesê hy kan nie glo dat die minister sou “lieg” om haar “onregverdige en ongrondwetlike optrede ten opsigte van my parool te probeer regverdig nie”. “Ek moet dus aanvaar dat een of ander amptenaar haar waningelig het, want ek het nooit so iets in enige aansoek gesê nie. Daar is ’n maklike manier om die saak reg te stel: Vra die betrokke amptenaar om haar te voorsien van die dokument waarin my beweerde verklaring staan. As dit wel lyk asof die minister die outeur van die leuen is, dan daag ek haar uit om ’n beëdigde verklaring in die verband af te lê sodat die reg kan geskied aangesien die verklaring net ’n blatante leuen is,” lui Derby-Lewis se verklaring.
Mapisa-Nqakula het ook verlede week gesê Derby-Lewis sal ook nie aanstaande jaar op parool vrygelaat word nie nadat sy weer sy paroolaansoek geweier het.
Volgens haar het Derby-Lewis nog nie aansoek gedoen om op mediese parool vrygelaat te word nie.
Derby-Lewis se aansoeke om op parool vrygelaat te word, is sedert 2008 herhaaldelik van die hand gewys. Hy sal aanstaande jaar opnuut aansoek doen om op mediese parool vrygelaat te word. Derby-Lewis word vir prostaat- en velkanker behandel.
Hy is tot 25 jaar tronkstraf gevonnis weens die moord in 1993 op Hani, die voormalige SAKP-leier.
- Volksblad