Departement se bote nie operasioneel
2012-10-24 13:35
Kaapstad – Nie een van die patrolliebote of navorsingskepe van die departement van landbou, bosbou en visserye, wat nou deur die vloot gebruik word, is operasioneel nie.
Nosiviwe Mapisa-Nqakula, minister van Verdediging en militêre veterane, het dít in reaksie op 'n parlementêre vraag van die Vryheidsfront Plus (VF Plus) gesê.
Drie van die vier bote is weens 'n gebrek aan onderhoudswerk nie operasioneel nie.
Die VF+ het Woensdag in 'n verklaring gesê die ander patrollieboot (Ruth First) word tans gebruik vir opleiding van bemanningslede en is ook nie operasioneel nie.
"Van die drie navorsingskepe is twee (Africana & Ellen Khuzwayo) nie operasioneel nie, ook weens onderhoud. Een navorsingskip (Algoa) is oorhandig aan die departement van omgewingsake en oseanografiese opmetings."
Pieter Groenewald, die VF Plus se hoofwoordvoerder oor verdediging en militêre veterane, het gesê dit is duidelik dat die land se kuswaters vanaf Maart 2012 nie gepatrolleer is nie.
"Stropery van ons marinebronne kon ongehinderd plaasvind. Dat onderhoud op al die bote en skepe terselfdertyd gedoen moet word, is bewys dat hulle in ‘n swak toestand was.
Smit Amandla Marine, wat hierdie bote bedryf en die patrollering van die kuswaters gedoen het, is luidens die verklaring miljoene rande betaal om die bote te bedryf en die instandhouding daarvan te doen.
Groenewald het gesê die party sal verdere vrae aan die minister van verdediging stel oor die aard en onkoste verbonde aan die onderhoud op die bote.
– Volg Nuus24 op Twitter
- Nuus24
