De Lille word glo môre lid van DA
2010-08-14 07:57
Kaapstad – Patricia de Lille, OD-leier, word na verwagting môre amptelik ’n DA-lid.
Onderhandelings vir samewerking tussen die twee partye word die naweek op die spits gedryf.
Bronne binne die DA het gister gesê OD-lede, onder wie De Lille, gaan moontlik môre dubbele partylidmaatskap aanvaar.
“Die OD is ’n sterwende party. Elkeen van sy openbare verteenwoordigers sal ’n besluit daaroor moet neem,” is vertroulik aan Beeld gesê.
Die OD het in Mei sy grondwet sodanig gewysig dat sy lede ook by ander partye kan aansluit, mits hulle toestemming verkry van die party se bestuur.
Die OD se federale raad vergader vandag in Kempton Park.
Joe McGluwa, OD-LP, het gister by navraag gesê besluite rondom samewerking met die DA sal op die vergadering bekragtig word.
- Beeld