De Lille se saak van hofrol geskrap

2012-11-08 10:08

Kaapstad – ‘n Saak van roekelose en nalatige bestuur teen Patricia de Lille se man is van die hofrol geskrap.

Cape Argus berig die burgemeester se man, Edwin (64), moes Woensdag in die Goodwood-landdroshof verskyn, maar het ‘n doktersbrief verskaf om sy afwesigheid te verduidelik.

Luidens die brief ly hy aan hipertensie en diabetes. Die nota, wat dr. Rafiq Abbas van die Grassy Park- mediese sentrum uitgeskryf het, het ook verduidelik dat De Lille op 11 Oktober ‘n beroerte gekry het.

De Lille is verlede week in Pinelands, Kaapstad op aanklag van roekelose en nalatige bestuur in hegtenis geneem. Die burgemeester het aan die koerant gesê haar man het ‘n beroerte agter die stuurwiel gekry.

Landdros Sean Lea sê die staat sal mnr. De Lille weer in hegtenis moet neem.

Volgens die nasionale vervolgingsgesag is die saak van die hofrol geskrap omdat die landdros nie tevrede is met die manier waarop mnr. De Lille gedagvaar is nie.

Volg Nuus24 op Twitter  

- SAPA